இலங்கை அரசும் படைத்தரப்பும் கூறுவது போல் வடக்கில் தங்களுக்கு எதுவித இராணுவ அழுத்தங்களுமில்லையெனவும் விரைவில் அவர்கள் உண்மை நிலையை உணருவார்களெனவும் விடுதலைப் புலிகள் தெரிவித்துள்ளனர்.

இது தொடர்பாக விடுதலைப் புலிகளின் அரசியல்துறைப் பொறுப்பாளர் பா.நடேசன் தினக்குரலுக்கு மேலும் கூறுகையில்;

வடக்கில் பல்வேறு முனைகளிலும் தினமும் படையினர் முன்னேறுவது போன்றதொரு தோற்றப்பாட்டை உருவாக்க அரசும் படைத்தரப்பும் முனைகின்றன.

ஆனால், உண்மையில் களநிலை அவ்வாறில்லை. களமுனையிலுள்ள படையினருக்கு இது நன்கு தெரியும். தினமும் அவர்கள் பேரிழப்புகளை சந்தித்து வருகின்றனர். கொல்லப்படும் படையினரின் உடல்களைக்கூட அந்தந்தப் பகுதியிலேயே புதைத்து வருவது உறுதிப்படுத்தப்பட்டுள்ளது.

வடக்கில் தாங்கள் வெற்றிகளைப் பெறுவதுபோல் தெற்கில் பெரும் பிரசாரங்களை மேற்கொண்டு வருகின்றனர். இதில் எவ்வித உண்மையுமில்லை. சிங்கள மக்களை ஏமாற்றவே அரசும் படைத்தரப்பும் இவ்வாறான பிரசாரங்களை மேற்கொண்டு வருகின்றன.

வடக்கில் தினமும் மேற்கொள்ளும் விமானத் தாக்குதல்கள் மூலம் மக்களை அச்சுறுத்த முயல்கின்றனர். ஆனால், அந்த அச்சுறுத்தல்களால் மக்கள் அச்சமடைவதில்லை. அவர்கள் இவற்றுக்கு பழக்கப்பட்டுவிட்டனர்.

இராணுவ ரீதியில் எதுவுமே செய்ய முடியாதென்ற நிலைக்கு அவர்கள் வந்துள்ளனர். இதனாலேயே எமது தலைவர் குறித்து அடிக்கடி பொய்ப்பிரசாரங்களை மேற்கொண்டு வருகின்றனர். ஆனால் இவற்றிலெல்லாம் எதுவித உண்மையுமில்லை. அவரை நெருங்கக்கூட முடியாது.

சமாதான முயற்சிகளில் கூட இலங்கை அரசுக்கு நாட்டமில்லை. நோர்வேயையும் ஒதுக்கிவிட அவர்கள் முயல்கின்றனர். பல நாடுகளையும் பகைத்துள்ளனர். ஐ.நா. அமைப்புகளுடன் கூட அவர்கள் முரண்பட்டுள்ளனர்.

அனைவரையும் பகைத்துவரும் இலங்கை அரசு இன்று தென்பகுதி மக்களை பெரிதும் ஏமாற்ற முயல்கிறது. எனினும், விரைவில் அந்த மக்கள் அதனைப் புரிந்துகொள்வார்களென்றும் தெரிவித்தார்.