சர்வதேச கிரிக்கெட் சபை (ஐ.சி.சி.) டெஸ்ட் போட்டியின் அடிப்படையில் நாடுகளின் தர வரிசைப் பட்டியலை வெளியிட்டுள்ளது. இதன்படி அவுஸ்திரேலிய அணி (141 புள்ளிகள்) தொடர்ந்து முதலிடம் வகிக்கிறது.

ஆமதாபாத் டெஸ்டில் இனிங்ஸ் தோல்வியை சந்தித்த இந்திய அணி கான்பூர் டெஸ்ட் போட்டியில் தோற்றால் 4 ஆவது இடத்துக்கு தள்ளப்படும் என்ற நிலையிருந்தது. ஆனால், கான்பூர் டெஸ்டில் தென்ஆபிரிக்காவை 8 விக்கெட் வித்தியாசத்தில் வீழ்த்தி தொடரை சமன் செய்ததன் மூலம் இந்திய அணி (111 புள்ளிகள்) 2 ஆவது இடத்தை தக்கவைத்துக் கொண்டது.

ஆமதாபாத் டெஸ்ட் போட்டியில் வெற்றி பெற்ற தென் ஆபிரிக்க அணி (109 புள்ளிகள்) ஒரு இடம் முன்னேறி 3 ஆவது இடத்தைப் பெற்றுள்ளது. மேற்கிந்தியாவுக்கு எதிரான டெஸ்ட் தொடரை 1- 1 என்று சமன் செய்த இலங்கை அணி (108 புள்ளிகள்) 3 ஆவது இடத்திலிருந்து 2 இடங்கள் பின்தங்கி 5 ஆவது இடத்துக்கு தள்ளப்பட்டுள்ளது.

இங்கிலாந்து அணி (108 புள்ளிகள்) 4 ஆவது இடமும் பாகிஸ்தான் அணி (94 புள்ளிகள்) 6 ஆவது இடமும் நியூசிலாந்து அணி (91 புள்ளிகள்) 7 ஆவது இடமும் மேற்கிந்தியா (77 புள்ளிகள்) 8 ஆவது இடமும் பங்களாதேஷ் (1 புள்ளி) கடைசி இடமும் வகிக்கின்றன.

துடுப்பாட்ட வரிசையில் கான்பூர் டெஸ்டில் ஆட்டநாயகன் விருது பெற்ற இந்திய வீரர் கங்குலி 7 இடங்கள் முன்னேறி 17 ஆவது இடத்தைப் பெற்றுள்ளார். டெண்டுல்கர் 13 ஆவது இடமும் டிராவிட் 14 ஆவது இடமும் ஷேவாக் 15 ஆவது இடமும் லட்சுமண் 19 ஆவது இடமும் வகிக்கின்றனர்.