பாகிஸ்தானில் சுற்றுப்பயணம் செய்த பங்களாதேஷ் அணி ஐந்து போட்டிகள் கொண்ட ஒருநாள் தொடரில் பங்கேற்றது. முதல் நான்கு போட்டிகளில் பாகிஸ்தான் 4 - 0 என்று வென்று தொடரைக் கைப்பற்றிவிட்ட நிலையில், ஐந்தாவது போட்டி பகலிரவு ஆட்டமாக கராச்சியில் நடந்தது. நாணயச்சுழற்சியில் வென்ற பாகிஸ்தான் அணி முதலில் துடுப்பெடுத்தாடியது. தொடரை ஏற்கனவே இழந்துவிட்டதால் ஒரே ஒரு ஆறுதல் வெற்றியாவது பெறவேண்டும் என்ற கட்டாயத்தில் இருந்தது பங்களாதேஷ் அணி.

தொடக்க வீரர்களாக ஆடிய சல்மான் பட் ஆரம்பம் முதலே அதிரடியாக தூள்கிளப்பினார். கம்ரன் அக்மல் (10) வந்த வேகத்தில் வெளியேறி ஏமாற்றினார்.

இரண்டாவது விக்கெட்டுக்கு களமிறங்கிய யூனிஸ்கான், சல்மான்பட்டுடன் ஜோடி சேர்ந்து (69) அரைச்சதம் அடித்த நிலையில் பெவிலியன் திரும்பினார். இந்த ஜோடி 179 ஓட்டங்கள் குவித்தது.சல்மான் பட் (14 பவுண்டரி, 1 சிக்சர்) தனது ஒருநாள் போட்டியில் அதிகபட்ச ஓட்டத்தை (136) பதிவுசெய்து ஆட்டமிழந்தார்.

இத்தொடரில் 23 வயது தொடக்க ஆட்டக்காரரான சல்மான் பட் வரிசையாக 33, 76, 132, 74 மற்றும் 136 என மொத்தம் 451 ஓட்டங்கள் குவித்து 2002 இல் சிம்பாவேவுக்கு எதிராக முகமது யூசுப்( 405) எடுத்த சாதனையை முறியடித்தார். யூசுப் (22), அப்ரிடி (4), கப்டன் சொய்ப் மாலிக் (27) அடுத்தடுத்து வெளியேற மிஸ்பா 22 பந்தில் 35 ஓட்டங்கள் குவித்து ஆட்டமிழந்தார். பின்வரிசை வீரர்கள் சொதப்ப பாகிஸ்தான் இறுதியில் 9 விக்கெட் இழப்புக்கு 50 ஓவரில் 329 என்ற இமாலய இலக்கை எட்டியது.

பங்களாதேஷ் தொடக்க ஜோடியான தமீம் இக்பால் (9), சித்திக் (6) ஏமாற்றமளித்தனர். கப்டன் அஸ்ரபுல் (30) ஓட்டங்களுக்கு பெவிலியன் செல்ல, மக்மதுல்லா (37) ஓட்டங்கள் எடுத்து ஆட்டமிழந்தார். அதன்பின் சொல்லிக்கொள்ளும்படியாக எந்த வீரரும் ஓட்டம் எடுக்கவில்லை. அப்தூர் ரசாக் 5 பவுண்டரி அடித்து விறுவிறுப்பு தந்த வேகத்தில் 33 ஓட்டங்களுக்கு வெளியேறினார். முடிவில் 40.5 ஓவரில் 179 ஓட்டங்களுக்கு பங்களாதேஷ் ஆட்டமிழந்தது.

அதிக விக்கெட்டுகள் வீழ்த்தி அசத்திய ஆசிப் ஆட்டநாயகனாகவும் தொடர் நாயகனாக சல்மான் பட்டும் அறிவிக்கப்பட்டனர். 1990 நவம்பரில் நிகழ்த்தப்பட்ட தொடர்ச்சியான 10 வெற்றிகள் என்ற சாதனையை சொய்ப் மாலிக் கூட்டணி தகர்த்து 11 வெற்றிகளை பதிவுசெய்தது.