37 ஆவது ஏப்ரல் வீரர்கள் தின ஞாபகார்த்த நிகழ்வு நேற்று சனிக்கிழமை மாலை கொழும்பு விஹாரமாதேவி பூங்காவில் நடைபெற்ற போது அதில் உரையாற்றுகையிலேயே இவ்வாறு தெரிவித்த சோமவன்ச அமரசிங்க மேலும் கூறியதாவது;

மக்கள் விடுதலை முன்னணி ஒரு குடும்பம், இக்குடும்பத்தில் அண்ணன், தம்பி, அக்கா, தங்கை ஆகியோர் உள்ளனர். இவர்களுக்கு பிரச்சினைகள் ஏற்படுவது சகஜம்.

இலங்கை அரசாங்கம் தம்மிடம் மட்டுமே ஆயுதங்களை வாங்க வேண்டும் என இந்திய அரசு நிபந்தனை விதிக்கிறது. இலங்கை, இந்தியாவின் மாநிலம் அல்ல என்பதை அவர்கள் நினைவில் வைத்துக் கொள்ள வேண்டும். மக்கள் விடுதலை முன்னணி என்ற ஒரு கட்சி இல்லாவிட்டால் இலங்கை, இந்தியாவின் கால்பந்தாட்ட மைதானமாக மாறி இருக்கும். நோர்வே உட்பட ஏகாதிபத்திய நாடுகளின் மேலாதிக்க கோட்டையாக இலங்கை மாறியிருக்கும். இதனை நாமே தடுத்து நிறுத்தி இருக்கிறோம்.

வடக்கு, கிழக்கு மக்களுக்கு பூரண சுதந்திரம் வழங்க வேண்டும். மனித உரிமைகள் பாதுகாக்கப்பட வேண்டும். அப்போதுதான் அம்மக்கள் பிரபாகரனிடம் இருந்து பிரிந்து வருவார்கள். மக்கள் விடுதலை முன்னணி கொண்டு வந்த பத்தாயிரம் குளங்களை அமைக்கும் திட்டத்தை அமுல்படுத்தி இருந்தால் இன்று அரிசி விலை இந்த அளவிற்கு உயர்ந்திருக்கமாட்டாது.

கிழக்கு மாகாணத்தில் தேர்தலில் போட்டியிடும் பொதுஜன ஐக்கிய முன்னணியும் படுதோல்வி அடையும். பொதுத் தேர்தல் ஒன்றை நடத்துவதற்காகவே அரசாங்கம் இந்த தேர்தலை நடத்துகிறது. பொதுத் தேர்தல் ஒன்று நடந்தால் அரசாங்கத்தை தோல்வி அடையச் செய்து நாம் ஆட்சியைக் கைப்பற்றுவோம்.

இந்த அரசாங்கத்தின் ஊழல் மோசடி, களவு, கொள்ளை ஆகியன அதிகரித்து விட்டன. நாம் கட்சியை கைப்பற்றியவுடன் இவற்றை எல்லாம் விசாரித்து குற்றவாளிகளுக்கு கடும் தண்டனை வழங்குவோம்.

இதேவேளை, ஜே.வி.பி. கட்சியின் பிரசாரச் செயலாளர் பதவியிலிருந்தும் மத்திய குழு உறுப்பினர் உரிமையில் இருந்தும் தற்காலிகமாக இடைநிறுத்தப்பட்ட பாராளுமன்ற உறுப்பினர் விமல் வீரவன்ச இந்நிகழ்வில் கலந்து கொள்ளவில்லை.