இலங்கை, மே.இந்தியத் தீவு அணிகளிடையே குயின்ஸ்பாக் ஓவல் மைதானத்தில் நடைபெற்றுவரும் 2 ஆவது டெஸ்ட் போட்டியில் மே. இந்தியத்தீவு அணி வெற்றி பெறுவதற்கு 252 ஓட்டங்களை வெற்றி இலக்காகக் கொண்டுள்ளது.

2 ஆவது டெஸ்ட் போட்டியின் 3 ஆம் நாள் ஆட்டம் முடிவடையும் போது இலங்கை அணி 2 ஆவது இனிங்ஸில் அனைத்து விக்கெட்டுகளையும் இழந்து 268 ஓட்டங்களைப் பெற்றது.

இவ் அணி ஒரு கட்டத்தில் 6 விக்கெட்டுகளை இழந்து 99 ஓட்டங்களை மட்டுமே பெற்றது. இதன்பின் துடுப்பெடுத்தாடிய திலான் சமரவீரவும் சமிந்தவாஸும் பொறுப்புடனும் நிதானத்துடனும் துடுப்பெடுத்தாடி இணைப்பாட்டமாக 138 ஓட்டங்களைப் பெற்றனர். சமிந்தவாஸ் 45 ஓட்டங்களுடன் ஆட்டமிழந்தபோது இலங்கை அணி 7 விக்கெட்டுகள் இழப்புக்கு 237 ஓட்டங்களைப் பெற்றிருந்தது.

இதன்பின் திலான் சமரவீர 125 ஓட்டங்களைப் பெற்றபோது ஆட்டமிழந்தார். இதில் 18 பவுண்டரிகள் அடங்கும்.

இலங்கை அணியின் முன்னணி துடுப்பாட்ட வீரர்கள் குறைந்த ஓட்டங்களுடன் ஆட்டமிழந்த போதும் டில்சான் 19 பந்துகளைச் சந்தித்து 4 பவுண்டரிகள், ஒரு சிக்சர் அடங்கலாக 25 ஒட்டங்களைப் பெற்றார்.

இவர் 1 ஆவது இனிங்ஸிலும் 8 பவுண்டரிகள் அடங்கலாக 62 ஓட்டங்களைப் பெற்றதும் குறிப்பிடத்தக்கது. பந்து வீச்சில் ரெயிலர் 52 ஓட்டங்களைக் கொடுத்து 4 விக்கெட்டுகளையும் ஹெயில், பவல், எட்வேட், பிராவோ தலா ஒரு விக்கெட்டையும் கைப்பற்றினார்கள்.

இந்த 2 ஆவது டெஸ்ட் போட்டியில் மே.இந்தியத்தீவு அணிக்கே வெற்றி வாய்ப்புக் கூடுதலாக இருக்கின்றது. 1 ஆவது டெஸ்ட் போட்டியில் இலங்கை அணி வெற்றி பெற்றதும் குறிப்பிடத்தக்கது.

ஸ்கோர் விபரம்: இலங்கை 1 ஆவது இனிங்ஸில் 278 ஓட்டங்கள், 2 ஆவது இனிங்ஸில் 268 ஓட்டங்கள். மே.இந்தியத்தீவு 1 ஆவது இனிங்ஸில் 294 ஓட்டங்கள்.