மழை பெய்ததால் ஆட்டம் தொடங்குவதில் தாமதம் ஏற்பட்டது. பின்னர் தலா 16 ஓவர்கள் கொண்ட போட்டியை நடத்த முடிவு செய்யப்பட்டது. கொல்கத்தா அணியில் அக்தர் இடம்பெறவில்லை. நாணயச் சுழற்யில் வென்ற கங்குலி முதலில் துடுப்பாட்டத்தை தேர்வு செய்தார்.

கொல்கட்டா அணி தொடக்கத்தில் தடுமாறியது. பின்னர் கங்குலி, டேவிட் ஹசி இணைந்து கலக்கினர். இந்த நேரத்தில் ஒயிட் துல்லியமாக `த்ரோ' செய்ய கங்குலி (20) ரன் அவுட்டானார். கும்பிளே வீசிய 9 ஆவது ஓவரில் அடுத்தடுத்து இரண்டு இமாலய சிக்சர் அடித்த ஹசியும் 26 ஓட்டங்களுக்கு ரன் அவுட்டாக சிக்கல் ஏற்பட்டது.

கடைசிக் கட்டத்தில் சாகா, முரளி கார்த்திக் கைகொடுத்தனர். கொல்கத்தா நைட் ரைடர்ஸ் அணி 16 ஓவரில் 7 விக்கெட் இழப்புக்கு 129 ஓட்டங்கள் எடுத்தது.

இலகுவான இலக்கை விரட்டிய பெங்களூர் அணி தொடக்கத்தில் திணறியது. சந்தர்போல் (7), அருண்குமார் (22) விரைவாக நடையை கட்டினர். அடுத்து வந்த கப்டன் டிராவிட் (5), கங்குலி பந்துவீச்சில் பரிதாபமாக போல்டானார். ஒயிட் 30 ஓட்டங்கள் எடுத்தார்.

கடைசி ஓவரில் 19 ஓட்டங்கள் எடுத்தால் வெற்றி என்ற நிலை ஏற்பட்டது. இஷாந்த் சர்மா கட்டுக் கோப்பாக பந்து வீசினார். பவுச்சர், பிரவீண் தலா ஒரு பவுண்டரி அடித்த போதும் தேவையான ஓட்டங்களை எடுக்க முடியவில்லை. 16 ஓவரில் பெங்களூர் ரோயல் சலஞ்சர்ஸ் அணி 4 விக்கெட் இழப்புக்கு 124 ஓட்டங்கள் எடுத்து தோல்வியடைந்தது.