அமெரிக்க ஜனாதிபதித் தேர்தலில் ஜனநாயகக் கட்சி வேட்பாளராகத் தெரிவு செய்யப்படுவதற்கு தீவிரமாகப் போட்டியிட்டு வரும் செனட்டர் பராக் ஒபாமா விசேட பேராளர்களின் எண்ணிக்கையிலும் முதல் தடவையாக மற்றைய செனட்டரான ஹிலாரி கிளின்டனை முந்தியுள்ளார்.
முன்னர் ஹிலாரிக்கு ஆதரவளித்த இரு விசேட பேராளர்கள் உட்பட 4 விசேட பேராளர்கள் ஒபாமாவுக்கு ஆதரவளிப்பதாக உறுதியளித்துள்ளனர்.
மாநிலங்கள் தோறும் நடத்தப்பட்டு வரும் ஆரம்ப கட்ட தேர்தல்களிலும் பேராளர்களின் எண்ணிக்கையிலும் ஒபாமா வலுவான முன்னிலையில் உள்ளமை குறிப்பிடத்தக்கது.
கட்சியின் வேட்பாளரை தெரிவு செய்வதில் விசேட பேராளர்களின் பங்கு மிகவும் முக்கியத்துவம் வாய்ந்ததென்பது குறிப்பிடத்தக்கது.
ஒபாமாவுக்கு புதிதாக 9 விசேட பேராளர்கள் தமது ஆதரவை வழங்கியிருப்பதன் மூலம் தற்போது ஒபாமா 275 விசேட பேராளர்களின் ஆதரவையும் ஹிலாரி 271 பேரின் ஆதரவையும் பெற்றுள்ளனர்.
எதிர்வரும் ஆகஸ்டில் நடைபெறவுள்ள வேட்பாளர் தெரிவிற்கு முன்னர் இன்னும் 6 மாநிலங்களில் ஆரம்பக்கட்ட தேர்தல்கள் நடைபெறவுள்ளமை குறிப்பிடத்தக்கது.
ஆகஸ்டில் நடைபெறவுள்ள ஜனநாயகக் கட்சியினரின் மாநாட்டில் 800 விசேட பேராளர்கள் ஜனநாயகக் கட்சி வேட்பாளரை தெரிவு செய்வர்.
குடியரசுக் கட்சியின் வேட்பாளராக ஏற்கனவே ஜோன் மக்கெய்ன் தெரிவு செய்யப்பட்டுள்ளாரென்பது குறிப்பிடத்தக்கது.
