இந்தியன் பிரிமியர் லீக் (ஐ.பி.எல்) `ருவன்ரி-20' தொடர் நேற்று முன்தினம் ஐதராபாத்தில் நடந்த 32 ஆவது லீக் போட்டியில் டெக்கான் சார்ஜர்ஸ் அணி கொல்கத்தா நைட் ரைடர்ஸ் அணிகள் மோதின.லட்சுமண் காயம் குணமடையாததால் டெக்கான் அணியின் கப்டன் பொறுப்பை மீண்டும் கில்கிறிஸ்ட் ஏற்றார். நாணயச் சுழற்சியில் வென்ற கங்குலி முதலில் துடுப்பாட்டத்தை தேர்வு செய்தார்.

மேற்கிந்திய சுற்றுப்பயணத்திற்கான அவுஸ்திரேலிய அணியில் இடம்பிடித்த பிராட் ஹொட்ஜ் நாடு திரும்பினார். இவருக்குப் பதிலாக கொல்கத்தா நைட் ரைடர்ஸ் அணியில் பாகிஸ்தானின் சல்மான் பட் வாய்ப்புப் பெற்றார். மிகவும் எதிர்பார்க்கப்பட்ட அக்தருக்கு இம்முறையும் அணியில் இடம் கிடைக்கவில்லை. டெக்கான் அணியில் மோசமான போர்ம் காரணமாக அப்ரிடி நீக்கப்பட்டு சமிந்தவாஸ் இடம்பிடித்தார்.

கொல்கத்தா அணிக்கு தொடக்க வீரர்களாக ஆகாஷ் சோப்ரா, சல்மான் பட் களமிறங்கினர். கிடைத்த வாய்ப்பை பயன்படுத்திக்கொள்ளத் தவறிய சல்மான் (4) முதல் ஓவரிலே அரங்கு திரும்பினார்.

அடுத்து கங்குலி வந்தார். வாஸ் வீசிய 3 ஆவது ஓவரில் வரிசையாக இரண்டு பவுண்டரிகளை விரட்டினார். அடுத்த ஓவரிலும் இவர் இரண்டு பவுண்டரிகள் விளாசினார். மறுமுனையில் ஆகாஷ் சோப்ரா இவருக்கு நல்ல ஒத்துழைப்புக் கொடுத்தார். ஆகாஷ் சோப்ரா (24), கிப்சின் துல்லிய `த்ரோவில்' ரன் அவுட்டானார்.

நான்காவது வீரராக டேவிட் ஹசி வந்தார். வேணுகோபால் பந்தில் பவுண்டரி அடித்து கங்குலி அரைச்சதமடித்தார். அபார ஆட்டத்தை வெளிப்படுத்திய இவர் ஓஜா வீசிய 14 ஓவரில் அடுத்தடுத்து இரண்டு சிக்சர் அடித்து அசத்தினார். பின்னர் ஒரு பவுண்டரியும் விளாச அந்த ஓவரில் கொல்கத்தா நைட் ரைடர்ஸ் அணிக்கு மொத்தம் 19 ஓட்டங்கள் கிடைத்தது.

தொடர்ந்து கலக்கிய கங்குலி, ஸ்டைரிஸ் ஓவரில் இரண்டு இமாலய சிக்சர்கள் விளாசி ரசிகர்களுக்கு வாணவேடிக்கை காட்டினார். வாஸ் வீசிய அடுத்த ஓவரில் இந்த ஜோடி 2 சிக்சர், ஒரு பவுண்டரி அடிக்க ஓட்ட விகிதம் `ரொக்கெட்' வேகத்தில் எகிறியது.

மறுமுனையில் ஹசி, ஆர்.பி.சிங் ஓவரில் இரண்டு சிக்சர், ஒரு பவுண்டரி உட்பட மொத்தம் 20 ஓட்டங்கள் எடுத்து அரைச்சதம் பதிவுசெய்தார். இந்த ஜோடி மூன்றாவது விக்கெட்டுக்கு 102 ஓட்டங்கள் எடுத்த நிலையில் சதமடிப்பார் என எதிர்பார்க்கப்பட்ட கங்குலி அரங்கு திரும்பினார். 5 சிக்சர், 11 பவுண்டரி அடித்த இவர் 57 பந்தில் 91 ஓட்டங்கள் எடுத்து சதவாய்ப்பை நழுவவிட்டார்.

கொல்கத்தா நைட் ரைடர்ஸ் அணி 20 ஓவரில் 4 விக்கெட் இழப்பிற்கு 204 ஓட்டங்கள் எடுத்தது. டேவிட் ஹசி 57 (3 சிக்சர், 4 பவுண்டரி), சுக்லா 14 ஓட்டங்களுடன் ஆட்டமிழக்காமலிருந்தனர்.

கடின இலக்கை சேஸ் செய்த டெக்கான் சார்ஜர்ஸ் தொடக்கத்தில் தடுமாறியது. டின்டா வேகத்தை எதிர்கொள்ள திணறிய கிப்ஸ் (5), கில்கிறிஸ்ட் (24) வரிசையாக அரங்குக்கு திரும்பினர். பந்து வீச்சில் கலக்கிய கங்குலி ஸ்டைரிசை (5) வெளியேற்றி அணியின் வெற்றி நம்பிக்கையை அதிகரித்தார்.

அடுத்து நல்ல போர்மில் இருக்கும் ரோகித் சர்மா வந்தார். கங்குலி பந்தில் ஒரு இமாலய சிக்சர் அடித்தார். இவரது அடுத்த ஓவரில் மீண்டும் ஒரு சிக்சர் அடித்து ரசிகர்களுக்கு கிரிக்கெட் விருந்து படைத்தார். இதையடுத்து கப்டன் கங்குலி, டின்டாவிடம் பந்தை கொடுத்தார். இதற்கு உடனடியாகப் பலன் கிடைத்தது. இவர் 2 சிக்சர், 3 பவுண்டரி அடித்த ரோகித் சர்மாவை (33) அரங்கிற்கு அனுப்பி வைத்தார்.

பங்கர் (2), வாஸ் (9) விரைவில் வெளியேறினர். ஒரு முனையில் வரிசையாக விக்கெட்டுகள் விழுந்த போதிலும் மறுமுனையில் வேணுகோபால் அதிரடி காட்டினார். இஷாந்த் பந்தில் ஒரு சிக்சர், ஒரு பவுண்டரி அடித்துக் கலக்கினார். குல் பந்தில் `மெகா' சிக்சர் அடித்து அரைச் சதம் பதிவுசெய்து ஆறுதலளித்தார்.

ஓவருக்கு ஒரு சிக்சர் வீதம் கொல்கத்தா பந்து வீச்சை சிதறடித்த இவர் இறுதிவரை அணியின் வெற்றிக்காகப் போராடினார். 6 சிக்சர், 4 பவுண்டரி விளாசிய இவர் 42 பந்தில் 71 ஓட்டங்கள் எடுத்து ஆட்டமிழக்காமலிருந்தார். டெக்கான் அணி 20 ஓவரில் 7 விக்கெட் இழப்புக்கு 181 ஓட்டங்கள் எடுத்து தோல்வியடைந்தது.