பாராளுமன்றத்தில் நேற்று செவ்வாய்க்கிழமை சபை அலுவல்கள் நடவடிக்கைகள் முடிவடைந்த பின் சிறப்புரிமை பிரச்சினையை ஐ.தே.க.எம்.பி. லக்ஷ்மன் கிரியெல்ல எழுப்பினார்.

பதில் செயலாளர் நாயகம் கித்துல்கொடவின் நியமனம் 14 நாட்களுக்கு மாத்திரமே எனக் கூறப்பட்டது. தற்போது அவர் 14 நாட்களுக்கும் மேல் பதவியில் நீடிக்கிறார். இது அரசியலமைப்பு சட்டவிதிகளை முற்றாக மீறும் செயலாகும்.

இதன்போது சபாநாயகர் வி.ஜே.மு.லொக்குபண்டார குறுக்கிட்டு கித்துல்கொட பாராளுமன்ற பதில் செயலாளராக நியமிக்கும் மற்றுமொரு கடிதத்தை ஜனாதிபதி தனக்கு அனுப்பிவைத்துள்ளதாக குறிப்பிட்டார்.

இதன் போது மீண்டும் குறுக்கிட்ட லக்ஷ்மன் கிரியெல்ல எம்.பி.அக்கடிதத்தில் மற்றுமொரு பிரதியை இச்சபையில் சபாநாயகர் சமர்ப்பிக்க வேண்டுமென்றார்.

இதற்கு விளக்கம் வழங்கிய சபாநாயகர், ஜனாதிபதி தனக்கனுப்பும் கடிதங்களை சபையில் சமர்ப்பிக்க வேண்டிய சம்பிரதாயம் இல்லை. சபாநாயகரென்ற வகையில் தாம் தெரிவிக்கும் கருத்துக்களில் சபை உறுப்பினர்கள் நம்பிக்கை கொள்வது அவசியமென்றார்.

இச்சமயம் ஐ.தே.க.மற்றும் ஜே.வி.பி.எம்.பி.க்கள் ஒரே சமயத்தில் எழுந்து கருத்துக்களை கூற முயன்றனர். இதன்போது ரணில் விக்கிரமசிங்கவும் எழுந்து நின்றார்.

இந்நிலையில் ரணிலுக்கு உரையாற்ற சபாநாயகர் அனுமதி வழங்கினார்.

இதன்போது ரணில் கருத்து தெரிவிக்கையில்;

பதில் செயலாளர் நாயகம் கித்துல்கொட குறித்த சர்ச்சைக்குரிய சிக்கலைத் தீர்க்க எம்முன் இரு முக்கிய தெரிவுகள் உள்ளன.

அதாவாது (ஒன்று) கித்துல்கொட தற்போது இரு பதவிகளை வகிக்கிறார். எனவே அவர் ஒரு பதவியிலிருந்து ராஜிநாமா செய்து விட்டு மற்றைய பதவியை வகிக்க வேண்டும்.

இரண்டாவது, சபையில் இது குறித்து விவாதிப்பதை தவிர்த்து கட்சித் தலைவர்கள் கூட்டத்தில் அல்லது ஆலோசனைக் கூட்டத்தில் இதுபற்றி ஆராய்ந்து உரிய தீர்வு காணப்பட வேண்டுமென்றார்.

ரணிலின் இவ்விரு தெரிவுகளுக்கும் சபாநாயகர் பாராட்டு தெரிவித்ததுடன், இது பெரும் சர்ச்சையை தவிர்த்திருப்பதாகவும் சுட்டிக்காட்டினார்.

இதையடுத்து ஜே.வி.பி.யினரும் இதற்கு சம்மதம் தெரிவிக்கவே ரணிலின் ஆலோசனையினால் சர்ச்சை தவிர்க்கப்பட்டு சபை நடவடிக்கை வழமைக்கு திரும்பியது.